معلومات و موتوسيكلات و سكوتر

السلام عليكم ورحمة الله وبركاته

فى البداية انا من هواة قيادة الموتوسيكلات ... حبيت فى اول تدوينة ليا انى افيدكم فى موضوع الموتوسيكلات ده
بداية كدة اسعار الموتوسيكلات بتزيد فى الصيف .. عشان الطلب عليها بيزيد
خلينا بقا فى السؤال الرئيسي


- ساكن فى مكان بعيد عن شغلى وعايز وسيلة مواصلات تسلك فى الزحمة
وماتزهقنيش فى الصيانة وماتكونش مكلفة .. أعمل ايه ؟؟
- بسيطة .. ممكن تشترى موتوسيكل يوصلك ويرجعك .
- طيب اشترى موتوسيكل وللا سكوتر وللا فيزبا ؟؟
- ده يتوقف عليك انتا شخصيا
مسافتك كبيرة تتعدى ال 20 كيلو متواصل يبقى لازم موتوسيكل
مسافتك صغيرة ومابتعرفش تسوق كويس يبقى ممكن تجيب سكوتر


- طب والفيزبا ؟؟

* ابعد عن الفيزبا دى خالص .. ما بتتحملش حاجة ومسافات قصيرة بس
وبسرعة قليلة اقل من 60 كم/ساع لو عايزها تعيش معاك .. خلاف ان اتزانها قليل جدا جدا

- طيب ايه الميزة فى المتوسيكل عن الاسكوتر والعكس ؟
- الموتوسيكل :

فى استهلاك البنزين ( بتكلم عن 150 cc ) لتر البنزين بيمشيك 40 كيلو !!
وممكن تستخدم بنزين 80 بدون اى مشاكل ... وتبريد الموتوسيكل بالهواء وانتا ماشي بيه عادى
يتحمل مسافات طويلة فوق ال 20 كم وممكن تمشي بيه متواصل 200 كيلومتر لو واثق فى الكاوتش

ومش بيسخن لأن التبريد بالهواء وانت ماشي
ولو البطارية نامت منك .. واحدة منافلة تدور الموتوسيكل وتمشي عادي
ومن ناحية الصيانة .. الاعطال قليلة .. ومكشوفة وصيانتها سهلة وممكن تبقى تعملها بنفسك

-الاسكوتر :

يصلح للمسافات القصيرة ولغير محترفى القيادة
يعنى لو على أدك فى السواقة .. الاسكوتر بالنسبالك زى العجلة بالظبط بنزين وفرامل
بيشتغل ببنزين 92 وبرضو اللتر بيمشيك متوسط 35 كيلو الى 40
تبريد مياه وبيسخن فى الصيف ... بتضطر احيانا انك تقف لحد ما يبرد لو مسافتك طويلة
وزنه خفيف نسبيا لذا يصلح للبنات ايضا ...
لو عطل منك مش هتتعب انك تزقه لحد بتاع صيانة
صيانته اغلى قليلا من الموتوسيكل ... ومش اى حد بيشتغل فيه
حاول تشترى نوع فيه منافلة .. عشان لما البطارية تنام تعرف تشغله ومتنامش جمبه


تنصح بنوع ايه نجيبه فى الموتوسيكل او الاسكوتر او الفيزبا ؟

- موتوسيكل اى نوع مش هيفرق ... بس المهم تكون بتقدر توقفه على الحمالة بتاعته
انتا وصحتك يعنى :) ... انا شخصيا معايا بجاج بوكسر هندى .. ممتازة




- والصينى شغال كويس ... بس برضو خلى بالك ...
بيحل لوحده ... ابقى راجع على المسامير واربطها كويس مرة كل شهر
واختار حاجة على أد وزنك كدة تعرف تحركها وتوقفها على السنادة بتاعتها





- اما الاسكوتر ... اختار النوع اللى صيانته متوفرة ... زي مثلا sym وماتستكبرش فى الحجم ...
هاته على أدك .. على الأقل لما يعطل تعرف تمشي بيه لحد أقرب مكان أو تزقه لحد البنزينة لو البنزين خلص منك



- طب والفيزبا ؟؟
* افتكر انى قلتلك بلاش .... بس عموما اياك تجيبها فيزبا هندى صباب ... حاجة سيئة جدا الفيزبا الصباب دى
هاتها بستم .. ايطالى مش هندى ... فيزبا بستم ايطالى بتتحمل شوية .. بس كدة .. وانا لا انصح بالفيزبا اساسا

- أهم حاجة الزيت تغيره فى معاده
- احذر خطأ الغير ... وماتجريش جامد خصوصا لو الأرض عليها رمال
- ألبس الخوذة علشان لو طوبة أو حشرة طايرة فى الهواء جت فى وشك هتبهدلك
- ماتنساش تحط زيت على الكاتينة كل ما تلاقيها بدأت تنشف أو تصدأ
................
........
...
.
جزانا الله واياكم كل خير ...
أتمنى أن أكون قد أفدتكم بمعلومة جديدة
لا تسونا من صالح الدعاء